Hos 1 | NdeIBE | STEP | Ilizwi likaJehova lafika kuHoseya indodana kaBheyeri ngezinsuku zemibuso yabo-Uziya, loJothamu, lo-Ahazi loHezekhiya amakhosi akoJuda, kanye lasezinsukwini zokubusa kukaJerobhowami indodana kaJehowashi inkosi yako-Israyeli. y

Hosea 1

1 Ilizwi likaJehova lafika kuHoseya indodana kaBheyeri ngezinsuku zemibuso yabo-Uziya, loJothamu, lo-Ahazi loHezekhiya amakhosi akoJuda, kanye lasezinsukwini zokubusa kukaJerobhowami indodana kaJehowashi inkosi yako-Israyeli. y

UmkaHoseya labantwana

2 Kwathi uJehova eseqalise ukukhuluma ngoHoseya, uJehova wathi kuye, “Hamba uyethatha umfazi oyisifebe labantwana bobufebe, ngoba ilizwe lilecala lobufebe obubi kakhulu ngokweduka kuJehova.” 3 Ngakho wathatha uGomeri indodakazi kaDibilayimi, njalo wathatha isisu wamzalela indodana.

4 UJehova wasesithi kuHoseya, “Methe ibizo uthi nguJezereli, ngoba masinyane nje ngizayijezisa indlu kaJehu ngenxa yesihluku sokubulala abantu abanengi eJezereli, njalo ngizawuqeda umbuso wako-Israyeli.

5 Ngalolosuku ngizakwephula idandili lika-Israyeli eSigodini saseJezereli.”

6 UGomeri wathatha isisu futhi, wazala indodakazi. UJehova wasesithi, “Methe ibizo uthi nguLo-Ruhama, ngoba kangisoze ngibe lothando futhi endlini ka-Israyeli, ukuba ngibathethelele. 7 Kodwa ngizakuba lothando endlini kaJuda, njalo ngizabakhulula – kungayisikho ngedandili, inkemba kumbe impi, loba ngamabhiza langabagadi bamabhiza, kodwa ngoJehova uNkulunkulu wabo.”

8 UGomeri esekhuphe uLo-Ruhama ebeleni, waba lenye indodana.

9 UJehova wasesithi, ‘Methe ibizo uthi nguLo-Ami, ngoba lina kalisibo bantu bami, lami kangisuye uNkulunkulu wenu.

10 “Kodwa abako-Israyeli bazakuba njengetshebetshebe ekhunjini lolwandle elingeke lilinganiswe kumbe libalwe. Endaweni lapho okwakuthiwe khona kubo, ‘Kalisibo bantu bami,’ bazabizwa ngokuthi, ‘madodana kaNkulunkulu ophilayo.’ 11 Abantu bakoJuda labantu bako-Israyeli bazamanyana, njalo bazakhetha umkhokheli oyedwa baphume elizweni, ngoba luzakuba lukhulu usuku lukaJezereli.